#在日落前交換日記
0831
廉價貨狂迷 奧仕卡
襯今個星期嘅schedule冇咁緊，返工之前有時間去流連＄12店，打算買啲盒仔呀～層架呀～將啲小物分門別類嘅板塊呀～掛勾呀～相架呀～抹布呀～筆筒呀～杯墊呀～好！起初都推住架購物車一路選購都覺得冇乜問題，直至我拎起杯墊，我先發覺中招，講真係屋企買買買買啲杯都已經覺得戇居，根本自己飲嘅飲品裏面八成係樽裝烏龍茶，一成係有氣檸檬水，剩低嘅係罐裝粟米湯。買杯墊嚟做乜鬼，你有幾可用杯啊阿薛生？真係失心瘋～
檢查一下車仔入面嘅物品，究竟自己攞咗啲咩：
1. 練習簿：到底我有幾多練習簿係只係開咗寫咗頭兩頁就唔好再寫落去呢？
2. 4R相架：唔關曬唔曬相事，我買相架嘅十成可能性，都只係為咗拎佢來做畫框表起啲水彩畫，但係我連喺書展買嘅嗰盒水溶性木顏色表層嗰層膠紙都未摵開，距離完成一幅畫，都太遠距離啦掛。
3. 豉油碟：你有幾可係屋企食飯吖？你有幾可係屋企食飯係會落豉油呀？你有幾可係屋企食飯落豉油嘅時候唔係直接倒落碗飯度啊？ OK ,又係你話俾自己知係我哋在顏料用嘅時候啲吖嘛？咁我哋返番第二點算呀。
明明每樣野都好似好實際咁，但落到我手上又好似全部都冇乜用🤷🏻♀️最後我將我買過嘅物品逐件逐件擺番好喺唔同嘅貨架，只係買咗一把紙扇，而紙扇⋯⋯又有幾實際呢請問？嗯⋯⋯大概係條命太矜貴，享受唔到買大量平宜貨嘅快感，可惜可惜。
姿整購物狂 Ning
Search